Psa 72 | KYG | STEP | O Gotiyo, hu'na, kagaemo kini vekamo alagepa aipa agesamo alika ami'negeno'ao vayakale'mo alagepa huno yagaino apateno. Fatago kavakamo alika kini vekamo mafa'ne'amo ami'negeno'ao kagemi ya'apimo o'male'nisaya vaya'aite'mo alagepa huno yagaino apateno.

Psalms 72

Ala kini vekae'mo ava gemae

1 O Gotiyo, hu'na, kagaemo kini vekamo alagepa aipa agesamo alika ami'negeno'ao vayakale'mo alagepa huno yagaino apateno. Fatago kavakamo alika kini vekamo mafa'ne'amo ami'negeno'ao kagemi ya'apimo o'male'nisaya vaya'aite'mo alagepa huno yagaino apateno. 3 Fatago kava'aleti'mo yagaino apate'ninage'a aise avele'e alopa avele'e'mo mai'naya vaya'mo alagepa hu'a maisageno hoya'apifati'mo alagepa ne'ya'mo afole aigiye. 4 Kini vekamo'a kagemi ya'apimo o'male'nisaya vaya'mo hapa maege kafu nehaya vaya'mo hapa maege huteno apakaetegamo hosu kava'mo nehaya vaya'mo apamagiteno alino afepi apategaiye.

5 Yegemo lege kaimo lege nehisige'apae'mo muki afina'mo kagaefeke'mo mono hugae. 6 Ko ne'aigeno'ae'mo hoya'e mopa'e'mo alagepa huno nehaneya agufa kava'mo huno hapa maesige'a alagepa hu'a maigae. 7 Maige maige huno mai'nisige'apae'mo fatago vaya'mo mago'e hu'a alagepa hu'a maigae. Muki afina'mo kaimo nelege'apae'mo alagepa hu'a magokepi lokae'a maigae.

8 Solovala ani'mo aluga aluga atupale'mo yagaino apategaiye. Alopa ani'mo nelamiya anite'e mugagaya faliga'e'mo muki vaya'aite'mo yagaino apategaiye. 9 Ka'me kotega mai'naya vaya'mogimo agaete'mo ape hu'a maisage'apae'mo kame vaya'amogimo agaefe'mo atete hute'a apago'ya faigae. 10 Sipeni kote'mo ne'yagaiya vaya'mogi'e muki solovala agi'nale'mo ne'yagaiya vaya'mogi'e'mo muki ya'mo fiku alini e'a amigae. Alepiya kote'mo ne'yagaiya vaya'mogi'e Itiyopiya kote'mo ne'yagaiya vaya'mogi'e'mo ofalinimo fiku amigae. 11 Muki kini vaya'amogimo agaete'mo ape hu'a maisage'apae'mo muki alu nofi vaya alu nofi vaya'mogimo ge'amo afite'a akame hugae.

12 Kagemi ya'apimo o'male'nisaya vaya'mogimo agaefe'mo keya ae'a ge nehisageno'ae'mo apakufamo alino katino apategaiye. Kafu nehaya vaya'mo hapa maege hapa no'maeya vaya'mo hapa maege huno hapa maegaiye. 13 Agaemo lokiya'apimo nohaneya vaya'e kafu nehaya vaya'efe'mo hau huno apategaiye. Kafu nehaya vaya'ai apakufamo alino katino apategaiye. 14 Hosu vaya'mogimo humi apatege apakufamo ali'a afepi apatege hute'a ne'apamagigeno'ae'mo miya faino hatu maeno apategaiye. Apakaemo kola'apimo hisiyafe'mo ohau'nigeno'ae'mo, kola'apie'mo hogote ya'mo hane'niye, huno agesamo ne'afiye.

15 Agaemo ofalino afa'a maigiye. Alepiya kotegati'mo monimo alini'e'a amigae. Muki afina'mo nunumu hu'a ategae. Muki afina'ae afina'ae'mo ala agi'amo amigae. 16 Avina ya'mo apayapi'mo ne'aliya agufa yakana huno ma mopafi'mo mago anaga avele'mo hakalegaiye. Hageteno'ae'mo asole ne'ya'mo aesigeno'ae'mo Lemani avefati'mo alopa yosamo'mo uti uti ne'aiya agufa kava'mo hugiye. Asole kahaumo alagepa huno nelagiya kava hu'a taonifi'mo mai'naya vaya'mo lusi kava hu'a asole vaya'mo afole aigae. 17 Yegemo hane'nigeno'ae'mo muki afina'mo agi'amo hanege hanege huno hane'nisige'a agi'ale'mo ali'a asaga huge huge hu'a maigae. Goti'a agaeteti'mo muki vaya'mo hapa maegaiye. Muki alu nofi vaya'mogi'e alu nofi vaya'mogi'e'mo agi'ale'mo ali'a asaga hu'a ategae. 18 Agai'age'mo hapau ne'aiya agufa alagepa kava'mo nehiya'mofe'mo Ala kava ne'mo Isaleli vaya'ai Goti'apimo agi'ale'mo ali'a asaga hu'a ateyo. 19 Ha le konali agi'ale'mo muki afina'mo ali'a asaga hiyo. Ala agi'amo'mo muki ma mopafi'mo aino atagu faeno uneno hisige'a muki vaya'mogimo agi'ale'mo ali'a asaga hiyo. He, lama ge, lama ge.

20 Nevini'mo Yesi mafa'ne'amo'mo muki alu ge alu gemo huno nunumu huge huge huno mai'niya nunumu ge'amo alagi huno hano hu'niye.